IL-MISSJONI TAGĦNA
Li nipprovdu servizz professjonali u fdat biex niżguraw pajjiż sikur fi sħubija mal-komunità.
Il-Viżjoni Tagħna
Il-viżjoni tagħna hija li l-komunità tafdana biex niżguraw soċjetà sikura għal kulħadd.
Il-Valuri Tagħna
Aħna nħaddnu l-erba’ valuri ta’ imparzjalità, integrità, tmexxija u rispett f’kull aspett tas-servizz tagħna. Nittrattaw l-individwi kollha b’mod ġust, naġixxu b ’mod trasparenti u etiku, niggwidaw u nagħtu s-setgħa lit-timijiet tagħna u nrawmu d-dinjità u l-ftehim, insaħħu l-fiduċja u l-kunfidenza tal-pubbliku. Permezz ta’ dawn il-prinċipji, naħdmu biex noħolqu ambjent sigur fejn kull membru tal-komunità jħossu protett u apprezzat.
L-Objettivi Tagħna
L-objettivi tal-Korp tal-Pulizija ta’ Malta huma stabbilti fil-Kapitolu 164 tal-Liġijiet ta’ Malta, taħt it-Taqsima II, Titolu I, dwar il-kostituzzjoni tal-Korp tal-Pulizija ta’ Malta. Speċifikament, it-taqsima 4, kif sostitwita bl-Att XIII tal-2002, tiddeskrivi l-għanijiet primarji tal-Korp, li jinkludu:
- li jżomm l-ordni u l-kwiet pubbliku, li ma jħallix li jsiru reati, li jġib ’il quddiem u jwettaq it-tħaris tal-liġijiet, bħala l-ewwel garanzija tad-drittijiet tal-persuni kollha f’Malta, ukoll qabel ma tkun meħtieġa xi azzjoni permezz tas-sistema ġudizzjarja għar-ripressjoni, sanzjoni jew rimedju ta’ ksur;
- li jirrispondi minnufih għal kull talba għall-ħarsien u l-intervent tal-liġi;
- li japplika l-liġi mingħajr diskriminazzjoni fuq kwalunkwe bażi bħal razza, kulur, lingwa, reliġjon, sess, orjentazzjoni sesswali, identità sesswali, diżabbiltà, opinjoni politika jew opinjoni oħra, oriġini nazzjonali jew soċjali, assoċjazzjoni ma’ minoranza nazzjonali, proprjetà, twelid jew status ieħor;
- li jġib ’il quddiem il-koeżistenza ordinata u paċifika tal-persuni kollha f’Malta, filwaqt li jieħu ħsieb kif dovut mhux biss tad-drittijiet dwar il-proprjetà privata imma wkoll dwar il-proprjetà pubblika;
- li jfittex li jħares l-ambjent;
- li jgħin, f’limiti raġonevoli, lil kull persuna li tkun qed tfittex l-għajnuna ta’ pulizija jew xi uffiċjal pubbliku ieħor ukoll jekk ir-responsabilità biex fl-aħħar mill-aħħar tiġi pprovduta dik l-għajnuna, ma tkunx tappartjeni lill-Korp; u
- li jwettaq onestament u effettivament dawk id-dmirijiet kollha lilu assenjati b’dan l-Att jew b’xi liġi oħra.