PR 567 26
Sorveljanza oħra b’rabta ma’ allegat traffikar tad-droga wasslet għall-arrest ta’ raġel ta’ 56 sena residenti Ħal Għaxaq u raġel ta’ 46 sena residenti r-Rabat, Għawdex. Huma nstabu fil-pussess ta’ diversi tipi ta’ droga u armi tan-nar.
Iż-żewġt irġiel twaqqfu aktar kmieni llum f’Raħal il-Ġdid, waqt li kienu f’vettura Ford Ranger. Minn tfittxija li saret fil-vettura instabu madwar 5 kilogrammi droga suspettata kannabis, kif ukoll arma tan-nar bil-munizzjon fiha.
Minn hemm il-Pulizija kompliet bi tfittxijiet f’residenza fil-Ħamrun fejn moħbija nstabu madwar 4 kilogrammi oħra sustanza suspettata kannabis, 3 kilogrammi droga suspettata kokaina, ammont ta’ flus kontanti, kif ukoll pressa industrijali li tintuża biex tiġi ppakjata d-droga.
Tfittxija oħra saret f’residenza f’Ħal Għaxaq fejn ġie ikkonfiskat ammont ta’ droga eroina kif ukoll arma tan-nar oħra.
Inkjesta mill-Maġistrat Dr Philip Galea Farrugia LL.D u l-investigazzjonijiet tal-Pulizija għadhom għaddejjin, filwaqt li l-irġiel qegħdin jinżammu fil-lock-up tal-Pulizija, il-Floriana.