(PR 95/26)
Ilbieraħ u kmieni dalgħodu, raġel u mara ttieħdu l-Isptar Mater Dei wara li weġġgħu f’żewġ inċidenti separati tat-traffiku.
L-ewwel inċident seħħ ilbieraħ, għall-ħabta tal-għaxra u kwart ta’ filgħaxija (2215hrs), fi Triq Birkirkara, San Ġiljan. Mill-ewwel stħarriġ irriżulta li Kroat ta’ 45 sena u jgħix San Ġiljan, tilef il-kontroll tal-mutur TVS Jupiter 125 li kien qed isuq u waqa’.
It-tieni inċident ġara għall-ħabta tal-ħamsa ta’ dalgħodu (0500hrs), fi Triq l-Imdina, Ħ’Attard. Mill-investigazzjonijiet preliminari rriżulta li mara ta’ 35 sena u resident r-Rabat, sofriet xi ġrieħi wara li tilfet il-kontroll tal-Ford Fiesta li kienet qiegħda ssuq u nqalbet.
Tim mediku ta l-assistenza fiż-żewġ inċidenti fejn iż-żewġ persuni ttieħdu l-isptar b’ambulanza għall-kura medika. Aktar tard huma ġew iċċertifikati bi ġrieħi gravi.
L-investigazzjonijiet tal-Pulizija għadhom għaddejjin.