PR 569 26
Żewġ Ingliżi, raġel ta’ 33 sena u mara ta’ 32 sena, nhar l-Erbgħa bil-lejl kienu arrestati fl-ajruport waqt li allegatament kienu qegħdin jitraffikaw id-droga.
Kienu għal xi l-ħdax (2300hrs), meta l-pulizija irċeviet telefonata anonima li fis-sala tat-tluq kien hemm mara u raġel, allegatament ibiegħu d-droga. Wara li l-pulizija ngħatat deskrizzjoni tagħhom, minnufih bdiet tfittxija għaż-żewġ persuni, fejn dawn instabu ftit tal-ħin biss wara fis-sular t’isfel tal-ajruport u ġew arrestati.
Minn analiżi li saru dak il-ħin minn fuq kameras tas-sigurtà, ġie stabbilit li kienu qegħdin jagħmlu użu minn vettura li kienet ipparkkjata fil-parkeġġ tal-istess ajruport. Għaldaqstant saret tfittxija fil-vettura fejn fiha nstabu erba’ qratas b’sustanza suspettata kokaina, żewġ qratas b’sustanza suspettata ħaxixa tal-kannabis, seba’ pilloli suspettati ecstasy, kif ukoll 54 flixkun b’Nitrous Oxide, magħruf bħala laughing gas, u madwar €1,000 fi flus kontanti.
Iż-żewġ persuni qed jinżammu fil-lock-up tal-Pulizija u huma mistennija jitressqu l-Qorti aktar tard illum.