(PR 440/26)
Ilbieraħ filgħaxija, għall-ħabta tal-ħdax ta’ filgħaxija (2300hrs), il-Pulizija ġiet infurmata li kien hemm bżonn l-assistenza tagħha fi Triq il-Manikata, il-Mellieħa.
Il-Pulizija marret mill-ewwel fuq il-post u hemmhekk irriżulta li Suzuki Swift, misjuqa minn mara ta’ 28 sena residenti Santa Venera kienet ħabtet ma’ arblu u spiċċat fil-karreġġjata opposta.
Konsegwenza t’hekk, is-Suzuki ħabtet f’karozza tal-linja, misjuqa minn raġel ta’ 48 sena residenti San Pawl il-Baħar u vann Mercedes Sprinter misjuq minn raġel ta’ 33 sena residenti San Pawl il-Baħar.
Tim mediku kien imsejjaħ fuq il-post fejn ingħatat l-assistenza lill-mara kif ukoll lil tifla ta’ 4 snin li kienet passiġġiera fil-vettura magħha. Huma ttieħdu l-Isptar Mater Dei b’ambulanza fejn aktar tard it-tifla kienet iċċertifikata bi ġrieħi gravi filwaqt li l-mara ma sofrietx ġrieħi.
L-investigazzjoni tal-Pulizija dwar dan l-inċident għadha għaddejja.