(PR 312/25)
Ilbieraħ, għall-ħabta tal-ħamsa u nofs ta’ waranofsinhar (1730hrs), il-Pulizija ġiet infurmata li kien hemm bżonn l-assistenza fi Triq San Ġwann, in-Naxxar.
Il-Pulizija marret immedjatament fuq il-post fejn minn stħarriġ preliminari li sar irriżulta li tifel ta’ 6 snin waqt li kien ma` xi familjari f’għelieqi li għandom fl-inħawi, qabad jimxi fil-madwar u tbiegħed minnhom. Kif indunaw b’hekk, huma marru jfittxuh u minnufih infurmaw lill-Pulizija.
Diversi sezzjonijiet tal-Pulizija kienu nfurmati u bdew it-tfittxijiet fiż-żona tal-madwar. Wara xi ħin, bl-użu ta’ drone tal-pulizija, it-tifel deher f’pixxina ta’ residenza oħra mitluf minn sensih. Huwa ngħata l-ewwel għajnuna minn uffiċjali tal-Pulizija stess, b’tim mediku jassisti ftit tal-ħin wara.
It-tifel ittieħed permezz t’ambulanza l-Isptar Mater Dei iżda sfortunatament aktar tard tilef ħajtu.
Il-Maġistrat Dr Joe Mifsud LL.D ġie infurmat bil-każ u ħatar inkjesta filwaqt li l-Pulizija għaddejja bl-investigazzjonijiet fuq il-każ.