(PR 455/26)
Aktar kmieni llum, għall-ħabta tal-ħdax u nofs ta’ filgħodu (1130hrs) il-Pulizija ġiet infurmata li kien hemm bżonn l-assistenza fi Triq Hanover, Bormla minħabba li kien hemm persuna li kellu xi ġrieħi.
Immedjatament il-Pulizija marru fuq il-post u rrizulta li l-vittma, raġel ta’ 49 sena residenti San Pawl il-Baħar, kien intlaqat minn karozza Peugeot, bix-xufier jaħrab bil-vettura minn fuq il-post.
Il-vittma ngħata l-għajnuna minn tim mediku u ttieħed l-Isptar Mater Dei b’ambulanza, fejn
ġie ċċertifikat li sofra ġrieħi gravi.
Investigazzjonijiet intensivi tal-pulizija wasslu sabiex ftit tal-ħin wara nstabet l-karozza involuta fi Triq San Ġorġ f’Bormla u jiġi arrestat l-allegat xufier, raġel ta’ 37 sena residenti Bormla stess.
L-investigazzjonijiet tal-Pulizija rigward dan il-każ għadhom għaddejjin biex tiġi stabbilita d-dinamika tal-każ.