PR 563 26
Investigazzjonijiet intensivi mill-Pulizija b’rabta ma’ serqa fuq anzjana ħallew il-frott hekk kif fis-sigħat illi għaddew, l-allegat ħalliel ġie identifikat u arrestat.
Il-każ seħħ il-Ħadd illi għadda, meta għal xi s-sebgħa ta’ filgħaxija (1900hrs), mara ta’ 81 sena residenti Birkirkara, irraportat fl-Għassa tal-Pulizija li kienet għadha kemm sfat misruqa waqt li kienet miexja fi Triq Santa Liena, Birkirkara.
Minn investigazzjonijiet li saru rriżulta li waqt li l-vittma kienet mixja, raġel liebes flokk u shorts iswed, attakkaha u ħadilha l-basket li kellha. Waqt li l-ħalliel ħarab minn fuq il-post, l-anzjana ma sofrietx ġrieħi.
Minn aktar stħarriġ li sar u wara li ġew analizzati numru ta’ filmati tas-sigurtà, ġie identifikat l-allegat ħalliel, raġel ta’ 36 sena u ġie arrestat aktar kmieni llum minn Ħal-Qormi.
Filwaqt li r-raġel qiegħed jinżamm fil-lock-up tal-Pulizija l-Furjana għal aktar investigazzjonijiet, huwa mistenni jitressaq il-Qorti fil jiem illi ġejjin.