(PR 54/25)
Kienu għall-ħabta tad-disgħa neqsin kwart ta’ filgħodu (0845hrs), xħin il-Pulizija ġiet infurmata li kien hemm bżonn l-assistenza tagħha f’appartament fi Triq il-Gardiel, Wied il-Għajn.
Il-Pulizija marru fuq il-post u sabu lill-mara b’arma li taqta’ u bil-ponta. Hija mxiet lejn il-Pulizija bl-arma b’mod aggressiv, u għalhekk kienu kostretti jużaw it-taser gun. Fl-appartament instab raġel ferut.
Mill-ewwel stħarriġ irriżulta li kien waqt argument bejn ir-raġel, li għandu 23 sena, u l-mara ta’ 22 sena, li fih allegatament intużat arma li taqta’ u bil-ponta.
Tim mediku ta l-assistenza liż-żewġ persuni li ttieħdu l-Isptar Mater Dei b’ambulanza għal aktar kura.
Aktar tard, ir-raġel ġie ċċertifikat bi ġrieħi gravi u l-mara bi ġrieħi ħfief.
Magistrate Dr Antoine Agius Bonnici LL. D ġie infurmat b’dan il-każ filwaqt li l-investigazzjonijiet tal-Pulizija għadhom għaddejjin.
Il-mara mistennija titressaq il-Qorti fil-jiem li ġejjin.