(PR 435/25)
Il-Pulizija flimkien ma’ uffiċjali tal-LESA komplew iwettqu spezzjonijiet ta’ rutina fit-toroq, fejn ġew imħarrka numru ta’ sewwieqa b’rabta ma’ ksur ta’ regolamenti tat-traffiku.
Waqt waħda minn dawn l-ispezzjonijiet dalgħodu f’Tal-Barrani, iż-Żejtun l-uffiċjali ħarġu 17-il taħrika lix-xufiera b’rabta ma’ irregolaritajiet diversi, filwaqt li 4 xufiera oħra ġew imħarrka wara li nstabu jsuqu bla liċenzja.
Wieħed minn dawn ix-xufiera twaqqaf waqt li kien qed isuq mutur u nstab li għandu biss 16-il sena. Immedjatament, il-mutur ittieħed mill-Pulizija filwaqt li għaddejjin iżjed investigazzjonijiet b’rabta mal-każ.
Filwaqt li l-appell jibqa’ lejn is-sewwieqa biex josservaw ir-regoli tat-traffiku b’rispett lejn ħajjithom u ħajjet nies oħra fit-triq, il-ħidma tal-Pulizija f’dan ir-rigward ser tkompli f’toroq u ħinijiet varji madwar Malta u Għawdex.