(PR 78/25)
Waqt spezzjonijiet f’toroq differenti li l-pulizija wettqet fi tmiem il-ġimgħa li għaddiet, mas-60 xufier ġew imħarrka wara li nqabdu jsuqu b’veloċità eċċessiva. Saru wkoll aktar minn 30 road-check f’lokalitajiet differenti, fejn twaqqfu mat-800 vettura bil-pulizija toħroġ diversi taħrikiet relatati ma’ ksur tar-regolamenti tat-traffiku.
Dawn l-ispezzjonijiet huma parti minn kontrolli ta’ rutina. Mill-1 ta’ Jannar sal-lum saru mal-500 road-check u li fihom twaqqfu eluf ta’ vetturi u nħarġu taħrikiet relatati ma’ ksur tar-regolamenti tat-traffiku, fosthom 750 taħrika b’rabta ma’ sewqan eċċessiv. Dawn saru f’toroq differenti madwar Malta u Għawdex. Ewlenin fosthom Triq Tul il-Kosta, Dawret San Pawl il-Baħar u Triq Garbaldi l-Marsa fejn diversi sewwieqa nqabdu jsuqu b’veloċità ta’ bejn il-113 u l-150 km/h f’żoni fejn il-massimu huwa ta’ 60, 70 jew 80 km/h.
Filwaqt li l-ħidma tal-Pulizija f’dan ir-rigward tkompli fil-ġranet u x-xhur li ġejjin, l-appell jibqa’ lejn is-sewwieqa biex josservaw ir-regoli tat-traffiku b’rispett lejn ħajjithom u ħajjet nies oħra fit-triq.