(PR 82/26)
Kmieni dalgħodu, għall-ħabta tan-nofsiegħa (0030hrs), il-Pulizija ġiet infurmata b’inċident tat-traffiku fi Triq tal-Barrani, Ħal Tarxien.
Il-Pulizija marret minnufih fuq il-post u minn stħarriġ preliminari rriżulta li kienet seħħet ħabta bejn BMW 120 li kienet qed tinstaq minn raġel ta’ 24 sena residenti n-Nadur u Mercedes E-class misjuqa minn raġel ta’ 21 sena residenti Wied il-Għajn.
Il-Mercedes imbaghad ħabtet f’Peugeot 208 li kienet wieqfa u li fiha kien hemm żewġ uffiċjali ta’ Transport Malta, ta’ 38 sena u 28 sena. Bl-impatt, din il-vettura ħabtet ġo Ford Transit li ukoll kien wieqaf.
Fuq il-post issejjaħ tim mediku u ambulanza ħadet liż-żewġ uffiċjali ta’ Transport Malta, li kienu fuq xoghol dak il-ħin, l-Isptar Mater Dei għall-kura.
Aktar tard, l-uffiċjal ta’ 38 sena ġie ċċertifikat li weġġa’ gravi filwaqt li l-ieħor sofra ġrieħi ta’ natura ħafifa.
L-investigazzjonijiet tal-Pulizija fuq dan il-każ għadhom għaddejjin.