(PR 513/26)
Tliet persuni ġew arrestati mill-Pulizija b’rabta ma’ sensiela ta’ serq, magħruf bħala ‘snatch and grab’ ta’ ġojjellerija minn fuq persuni fi stabbilimenti tad-divertiment f’Ta’ Qali.
Il-Pulizija kienet infurmata b’diversi każijiet ta’ serq ta’ ġojjellerija li seħħew matul il-lejl bejn it-28 u d-29 ta’ Awwissu 2026, bil-valur tas-serqiet jaqbeż is-€17,000.
Mill-investigazzjonijiet illi saru, inkluż analiżi ta’ filmati tas-sigurtá, irriżulta li l-każijiet kienu organizzati u kkoordinati mill-istess tliet persuni. Milli jidher, waqt li jkunu qed jiżfnu man-nies, jaħtfu u jiġbdu ġiżirajjen minn fuq l-għonq tal-vittmi u jaħarbu qalb il-folla.
Mill-istħarriġ li sar, il-pulizija rnexxielha tidentifika wieħed mis-suspettati u wara li saret sorveljanza, il-Pulizija rnexxielha tidentifika wkoll liż-żewġ persuni l-oħra. Dan wassal biex it-tliet persuni ġew arrestati minn residenza f’Birżebbuġa.
Waqt it-tfittxijiet li saru fir-residenza, instabu wħud mill-ġiżirajjen irrappurtati misruqa.
It-tliet persuni – li huma Taljani ta’ 45, 32 u 20 sena – qed jinżammu arrestati filwaqt li għadhom għaddejjin aktar investigazzjonijiet.
Il-persuni arrestati mistennija jitressqu l-Qorti llum, għall-ħabta tas-sagħtejn ta’ waranofsinhar (1400hrs), quddiem il-Maġistrat Dr Lara Lanfranco LL.D.