Vjolenza Domestika

Nieħdu l-każi tal-vjolenza domestika b’mod serju ħafna.

Aħna impenjati li nappoġġaw lil dawk affettwati mill-vjolenza domestika u li nipprovdu riżorsi biex niżguraw is-sigurtà u l-benesseri tagħhom. Ftakar, l-għajnuna hija disponibbli, u nħeġġu lil kull min jiffaċċja sfidi bħal dawn biex ifittxa malajr kemm jista’ jkun.

Jien vittma tal-vjolenza domestika?

Iva, jekk ir-relazzjoni mal-awtur tar-reat taqa’ taħt waħda jew iktar minn dawn il-kategoriji:

Miżżewġin jew eks-miżżewġin, sħab permezz ta’ unjoni ċivili jew koabitanti;
Persuni li jgħixu fl-istess dar jew li għexu fl-istess dar għal mill-inqas tliet snin qabel ma ġara l-każ;
Persuni li ż-żwieġ tagħhom ġie xolt jew dikjarat null;
Axxendenti jew dixxendenti;
Adulti oħra li jgħixu fl-istess dar;
Persuni li huma f’relazzjoni informali, li qed joħorġu jew li kienu joħorġu flimkien;
Persuni li kienu jew huma għarajjes bi preparazzjoni għaż-żwieġ jew għall-unjoni ċivili;
Persuni li jiġu minn xulxin b’mod bijoloġiku jew huma qraba sat-tielet grad ta’ qrubija;
Persuni li għandhom jew se jkollhom it-tfal flimkien

X’għandi nagħmel jekk jiena vittma ta’ vjolenza domestika?

int jew xi ħadd ieħor qiegħed f'riskju bħalissa? Tħossok mhux sigur jew inkwetat li sitwazzjoni tista’ teskala għal vjolenza dalwaqt? Hemm periklu immedjat għalik jew għal xi ħadd li taf? Jekk iva, jekk jogħġbok ċempel 112 issa. Jekk għandek indeboliment fis-smigħ jew fid-diskors, uża s-servizz tat-textphone tagħna 79770112.

Jekk ma tkunx emerġenza immedjata, tista’ tfittex l-għajnuna fi kwalunkwe għassa tal-pulizija, minn fejn inti tiġi akkumpanjat lejn wieħed mill-Hubs tal-Pulizija dwar il-Vjolenza Domestika u Vjolenza Abbażi tal-Ġeneru (GBDVU) għal investigazzjoni;

Tista’ wkoll tirrapporta direttament f’wieħed mill-Hubs dedikati tal-Vjolenza Domestika, li joperaw 24/7. L-istaff professjonali ta’ dan il-Unit jagħmel ħiltu kollha sabiex jitratta lill-vittmi ta’ abbuż domestiku b’rispett, b’dinjità u b’empatija, b’kollaborazzjoni assoluta mal-istakeholders kollha involuti inkluż il-ħaddiema soċjali.

Hub tal-Vjolenza Domestika f'Santa Luċija

Hub tal-Vjolenza Domestika fl-Imtarfa

X’għandi nagħmel jekk jiena vittma ta’ vjolenza domestika?

Quality Label Għall-Servizz t'Eċċellenza

Is-Sezzjoni Kontra l-Vjolenza Abbażi tal-Ġeneru u l-Vjolenza Domestika kiseb il-Quality Label.

Il-Quality Label hija marka ta’ kwalità li jista’ jikseb kull dipartiment jew entità fi ħdan l-Amministrazzjoni Pubblika, meta l-kwalità tas-servizz li jagħti lill-klijenti tilħaq il-livell ta’ servizz kif definit permezz tal-4 Pilastri tas-Servizz ta’ Kwalità (vuċi li tipprovdi smigħ lill-klijent u l-aspettattivi tiegħu, disinn li jitfassal fuq livelli taˈ kwalità fil-kuntest ta’ dawn l-aspettattivi, pakkett ibbażat fuq l-għotja ta’ servizz ta’ eċċellenza u kontabilità fejn kull min jagħti servizz jidħol responsabbli għas-sodisfazzjon tal-klijent), l-5 Kriterji ta’ Servizz ta’ Kwalità kif definiti mill-mudell ta’ kwalità SERVQUAL (Affidabilità, Empatija, Assigurazjoni, Reazzjoni u Aspetti Tanġibbli), Direttiva 4-2 u kull direttiva jew politika li tistabbilixxi livelli ġodda ta’ servizz ta’ kwalità fi ħdan l-Amministrazzjoni Pubblika.

Iċ-Charter tas-Sezzjoni Kontra l-Vjolenza Abbażi tal-Ġeneru u l-Vjolenza Domestika jista’ jitniżżel bil-verżjoni Ingliża minn hawn, u bil-verżjoni Maltija minn hawn.

Bil-kisba tal-Quality Label, is-Sezzjoni Kontra l-Vjolenza Abbażi tal-Ġeneru u l-Vjolenza Domestika huwa kommess li jwettaq monitoraġġ kontinwu tal-livelli miksuba bil-għan taż-żamma tal-Quality Label.

Aktar informazzjoni dwar il-Quality Label tista’ tiġi aċċessata minn hawn.