Il-Korp tal-Pulizija ta’ Malta jesprimi l-gratitudni tiegħu lejn Our Rescue, organizzazzjoni dinjija mingħajr profit imwaqqfa fl-2013, għall-appoġġ kontinwu tagħha lejn il-missjoni konġunta tagħna biex niġġieldu kontra l-isfruttament sesswali u t-traffikar tat-tfal.
Our Rescue hija dedikata biex tiġġieled it-traffikar sesswali u l-isfruttament tat-tfal madwar id-dinja b’approċċ doppju: permezz tal-empowerment ta’ aġenziji tal-infurzar tal-liġi u appoġġ lill-vittmi, biex jerġgħu jibnu ħajjithom. Huma jaħdmu id f’id ma’ korpi tal-pulizija lokali, nazzjonali u internazzjonali biex jipprovdu taħriġ vitali, tagħmir speċjalizzat u assistenza operattiva li jsaħħu l-kapaċitajiet investigattivi u jgħinu biex is-suspettati jitressqu quddiem il-ġustizzja.
Daqstant ieħor importanti huwa l-appoġġ ċentrat fuq il-vittmi. Our Rescue tiżgura li dawk affettwati jirċievu għajnuna komprensiva u b’sensittività għat-trawma — minn interventi f’każijiet ta’ kriżi u kura medika sa edukazzjoni u taħriġ vokazzjonali — sabiex jingħataw l-aqwa ċans għal fejqan fit-tul u rintegrazzjoni fis-soċjetà.
Permezz ta’ din is-sħubija kon[unta, Our Rescue ipprovdiet lis-Sezzjoni tas-Cyber Crime tal-Korp tal-Pulizija ta’ Malta b’għodod avvanzati u taħriġ speċjalizzat li jsaħħu l-isforzi tagħna biex nidentifikaw, ninvestigaw u nressqu l-qorti lil dawk lil dawk li jattakaw lill-iktar membri vulnerabbli tas-soċjetà tagħna. Dan il-kontribut isaħħaħ l-impenn kontinwu tagħna biex noħolqu ambjent diġitali aktar sigur għat-tfal kollha.
