(PR 709/24)
Illum, għall-ħabta tad-disgħa u kwart ta’ filgħodu (0915hrs), intalbet l-assistenza f’Misraħ San Ġakbu, Ħaż-Żabbar wara li vettura laqtet numru ta’ persuni.
Minnufih fuq il-post marru l-Pulizija flimkien ma’ numru ta’ ambulanzi u membri tal-Protezzjoni Ċivili.
Mill-ewwel investigazzjonijiet illi saru rriżulta li anzjan ta’ 79 sena residenti Ħaż-Żabbar, tilef il-kontroll tal-vettura Pajero Junior u aċċidentalment laqat xi persuni. Huwa ttieħed l-Isptar Mater Dei għall-osservazzjoni, iżda ma ġarrab ebda ġrieħi.
Dan filwaqt li erba’ nisa ta’ 39, 66, 77 u 84 sena u żewġt irġiel ta’ 36 u 81, kollha residenti Ħaż-Żabbar, ittieħdu l-Isptar Mater Dei b’ambulanzi. Aktar tard il-mara ta’ 84 ġiet iċċertifikata bi ġrieħi gravi u l-oħrajn kienu ċċertifikati bi ġrieħi ħfief. Tliet persuni oħra ngħataw il-kura fuq il-post tal-inċident.
L-investigazzjonijiet tal-pulizija b’rabta ma’ dan l-inċident għadhom għaddejjin.