PR 634/26
Aktar kmieni llum, raġel ta’ 75 sena residenti Ħal Safi, tilef ħajtu f’inċident li seħħ ġo sqaq fi Triq Wied iż-Żurrieq, iż-Żurrieq.
Kienu xi s-sebgħa u nofs ta’ filgħodu (0730hrs), xħin intalbet l-assistenza wara li l-Pulizija kienet infurmata li persuna tinsab feruta wara li ntlaqtet minn vettura. Mill-ewwel stħarriġ irriżulta li trakk tal-għamla Isuzu KC, li kien qed jintuża mill-vittma, għal xi raġuni mexa waħdu, bil-konsegwenza li r-raġel, inqabad bejnu u ħajt tas-sejjieħ.
Fuq il-post issejħu membri mid-Dipartiment tal-Protezzjoni Ċivili kif ukoll tim mediku mill-Isptar Mater Dei biex jassistu, imma sfortunatament huwa ġie ċċertifikat mejjet fuq il-post.
Bil-każ ġiet infurmata l-Maġistrat Dr Renata Farrugia LL.D li ħatret inkjesta u diversi esperti sabiex jassistuha filwaqt li l-investigazzjonijiet tal-Pulizija għadhom għaddejjin.