Sewwieq ta' mutur u raġel ittieħdu l-Isptar Mater Dei wara li weġġgħu f’inċidenti separati tat-traffiku lbieraħ filgħaxija.
L-ewwel inċident seħħ għall-ħabta tad-disgħa neqsin kwart (2045hrs), fi Triq Birżebbuġa, Birżebbuġa. Mill-ewwel investigazzjonijiet irriżulta li Albaniż ta’ 25 sena ntlaqat minn BMW, li kienet qed tinstaq minn raġel ta’ 21 sena residenti Birżebbuġa.
It-tieni inċident ġara għall-ħabta tal-ħdax neqsin kwart (2245hrs), fi Triq Tul il-Kosta, in-Naxxar. Mill-ewwel stħarriġ irriżulta li Ungeriż ta’ 37 sena tilef il-kontroll tal-mutur li kien qiegħed isuq, tat-tip Yamaha, u waqa’.
Tim mediku ta l-assistenza fiż-żewġ inċidenti u ż-żewġt irġiel ittieħdu l-isptar b’ambulanza, fejn ġew iċċertifikati li weġġgħu gravi.
L-investigazzjonijiet tal-Pulizija għadhom għaddejjin.