Omiċidju f’Marsalforn, Għawdex

Numru ta' Referenza: PR_251_22, Data ta' l-Istqarrija : Mej 08, 2022
 
​Ilbieraħ, għall-ħabta tad-disgħa ta’ filgħaxija (2100hrs), il-Pulizija ġiet infurmata li qam argument bejn diversi rġiel f’appartament fi Triq il-Wied, Marsalforn, Għawdex.

Il-Pulizija tad-Distrett flimkien mar-Rapid Intervention Unit (RIU) marru fuq il-post fejn ġie kkonfermat ir-rapport. Waqt li kienu hemm, il-Pulizija ġiet infurmata mill-Isptar Ġenerali t'Għawdex li tlitt irġiel daħħlu l-isptar raġel mitluf minn sensih u b’daqqiet ta’ sikkina. Sfortunatament, ir-raġel, li huwa Sirjan u għandu 25 sena, ġie ċċertifikat mejjet ftit tal-ħin wara. 

Mill-investigazzjonijiet li saru jidher li l-argument seħħ bejn grupp ta’ Sirjani li l-età tagħhom tvarja bejn l-24 sena u d-29 sena u waqt l-argument intużaw diversi oġġetti iebsin fosthom  injam, siġġijiet u s-sikkina. 

L-isptar iddaħħlu wkoll tlitt irġiel oħra li kienu involuti fl-argument u li għadhom qed jinżammu għal osservazzjoni minħabba xi ġrieħi li ġarrbu, taħt sorveljanza tal-pulizija. 

It-tlitt irġiel li ħadu lill-vittma l-isptar u raġel ieħor ġew arrestati u qed jinżammu fil-lockup fil-Kwartieri Ġenerali tal-Pulizija, il-Floriana għal aktar stħarriġ.

Bil-każ ġiet infurmata l-Maġistrat tal-Għassa Dr Bridgette Sultana LL.D li ħatret inkjesta filwaqt li l-investigazzjonijiet tal-Pulizija tad-Dipartiment tar-Reati Maġġuri u tad-Distrett ta’ Għawdex dwar dan l-omiċidju għadhom għaddejjin.